ப.சிதம்பரம் ஜாமின் வழக்கை வெள்ளிக்கிழமைக்கு ஒத்திவைத்து டெல்லி உயர்நீதிமன்றம் உத்தரவு

டெல்லி: ப.சிதம்பரம் ஜாமின் வழக்கை வெள்ளிக்கிழமைக்கு ஒத்திவைத்து டெல்லி உயர்நீதிமன்றம் உத்தரவிட்டுள்ளது. ஐ.என்.எக்ஸ். மீடியா முறைகேட்டில் அமலாக்கத்துறை தொடர்ந்த வழக்கில் ஜாமின் கேட்டு ப.சிதம்பரம் மனுத்தாக்கல் செய்திருந்தார். ஐஎன்எக்ஸ் மீடியா முறைகேடு வழக்கில் முன்னாள் மத்திய அமைச்சர் ப.சிதம்பரம் கடந்த ஆகஸ்ட் 21ம் தேதி கைது செய்யப்பட்டு திகார் சிறையில் அடைக்கப்பட்டார். சிபிஐயைத் தொடர்ந்து அமலாக்கத் துறையும் அவரை கைது செய்து விசாரணை நடத்தியது. முதலில் கடந்த 18ம் தேதி முதல் 24ம் தேதி வரை 7 நாட்கள் காவலில் எடுத்து விசாரிக்க அனுமதி வழங்கப்பட்ட நிலையில், கூடுதலாக 7 நாட்கள் விசாரிக்க அமலாக்க துறைக்கு அனுமதி தரப்பட்டது.

இந்நிலையில் இவ்வழக்கு சில தினங்களுக்கு முன் விசாரணைக்கு வந்தபோது, நவ.13ம் தேதி வரை ப.சிதம்பரத்தை நீதிமன்ற காவலில் சிறையில் வைக்க உத்தரவிடப்பட்டது. இந்த நிலையில், அமலாக்கப்பிரிவு வழக்கில் ப.சிதம்பரத்துக்கு ஜாமீன் வழங்க கோரி அவரது சார்பில் டெல்லி ஐகோர்ட்டில் கடந்த அக்டோபர் மாதம் 30ம் தேதி மனு தாக்கல் செய்யப்பட்டது. இதனை தொடர்ந்து, அவருக்கு ஜாமீன் வழங்க எதிர்ப்பு தெரிவித்து அமலாக்கப்பிரிவு பதில் மனு தாக்கல் செய்து உள்ளது. ப.சிதம்பரத்தின் ஜாமீன் மனு டெல்லி ஐகோர்ட்டில் நேற்று மீண்டும் விசாரணைக்கு வர  இருந்த நிலையில், தீஸ் ஹசாரி கோர்ட்டில் வக்கீல்கள் மற்றும் போலீசாருக்கு இடையே நடைபெற்ற தாக்குதலை கண்டித்து, டெல்லி ஐகோர்ட்டு வக்கீல்கள் நேற்று ஒருநாள் அடையாள வேலை நிறுத்தம் மேற்கொண்டனர். இதனால் ப.சிதம்பரத்தின் ஜாமீன் மனு மீதான விசாரணையை டெல்லி உயர்நீதிமன்றம் இன்று ஒத்திவைத்து. அதன்படி இன்று விசாரணைக்கு வந்தபோது, வழக்கு விசாரணையை வரும் வெள்ளிக்கிழமைக்கு ஒத்திவைத்து நீதிமன்றம் உத்தரவிட்டுள்ளது.